Promé aña EMCuraçao

Sep 26, 2013 | Newsletters

Anunsio pa prensa na okashon di promé aña di EMCuraçao,
22 di sèptèmber 2013.DSC_0511

Ku selebrashon di e promé aña di e “movementu” EMCuraçao nos a skohe pa duna un kontribushon na e proyekto “Reskate Agrikultura”.

E movementu EMCuraçao a nase for di e nesesidat pa promové medionan alternativa pa asina krea un mihó ambiente pa biba. Tur esaki ku e miro pa un komunidat salú ku konsientemente ta skohe un otro kaminda/direkshon pa desaroyo. Un kaminda diferente ku ta ofresé solushon pa e kantidat di formanan di polushon/kontaminashon ku nos komunidat “moderno” a kousa i ta kousa.

E movementu ta propagá un sistema di bida den kual e hende komo parti di naturalesa ta rekonosé su mes den naturalesa i ta apresiá esei. Un sistema di bida den kual tur loke ku ta bida riba Mama Tera ta sentral. Den e kuadro ei e énfasis ta riba uso di e.o. Mikro-organismo Efektivo (EM) den nos bida diario.

E aplikashon di EM den diferente área di bida a proba di ta un kambio di 180 grado. EM, un deskubrimentu di e Hapones Prof. Dr. Teruo Higa, ta wòrdu usá e.o. den medioambiente, agrikultura, ambiente di kas i salubridat, pa aktivá den un ambiente degenerativo un konsistensha regenerativo i mantené esei.

Uso di produktonan sintétiko (kunstmest) i/òf pestisida no ta nesesario mas ku uso di EM. Nos ta papia akinan di protekshon i asta di restorashon di nos naturalesa. Tur esaki ta skibi e.o. den su bukinan: “An Earth Saving Revolution” tomo 1 i 2.

Un di e métodonan importante ku Dr. Higa a desaroyá ta e hèmber di Bokashi pa kushina. E hèmber aki ta ofresé e posibilidat pa resiklá sobrá di kushina i traha kòmpòst. Asina na un manera saludabel tur sobrá di kushina  (+ 30% sushi di tur kas) ta keda prosesá bèk den suela. Si nos deshasí asina aki di sushi nos ta krea e oportunidat pa stimulá un suela fèrtil pa kultivá bèrdura i fruta di kalidat haltu.

Na Hapon nan a logra den e distrito di Kani pa baha e gastunan di prosesá sushi ku 30%, dor di hasi usu di e hèmber di Bokashi. E habitantenan a bai kultivá e.o. bèrdura salú sin hasi uso di kunstmest (abono artifisial) i pestisida.

EMCuraçao ta regalá “Reskate Agrikultura” un sèt di hèmber di Bokashi pa traha kòmpòst, i un liter di EM 5 pa subi resistensia di e matanan ku asina nan no ta keda afektá pa malesa i insektonan dañino. Tambe EMCuraçao lo duna un tayer na e tim i muchanan di “Reskate”, pa siña kon ta resiklá sobrá di kushina hasiendo uso di e hèmber di Bokashi.

EMCuraçao ta spera ku e gesto aki ta stimulá e inisiativa di sra. Magali Maria pa siña muchanan kultivá bèrdura i fruta den harmonia ku naturalesa.

Awendia a keda probá rònt mundu ku plantashon orgániko di kultivo di kalidat haltu i oumento di produkshon ta posibel ku e teknologia di EM. I awor na Kòrsou tambe.

Sandovar

EMCuraçao