Noti-ambiente 05 / Anti-oksidante

Anti-oksidante

Kerido amigunan di EM,

Meta prinsipal pa publiká nos noti-ambiente ta pa kontribuí na un konsenshi nobo den e Era Nobo. Kada un tópiko ku nos relatá ta di suma importansia pa nos salú i nos bienestar den kontakto ku naturalesa.

Kiko ta anti-oksidante?

Anti-oksidante ta un grupo di molekül ku ta kapas di stroba oksidashon di otro molekül. Den nos kurpa tin varios nutriente ta sirkulá na un manera natural dor di e propiedatnan di anti-oksidante. Tambe nos kurpa ta produsí enzimanan anti-oksidante pa kontrolá e kadena di reakshon di e radikalnan liber.

Nos kurpa ta produsí sierto tipo di anti-oksidante, pero otro no. Dje otro banda, e produkshon natural di anti-oksidante dor di nos kurpa ta baha, segun nos edat ta subi.
Bo tabata sa ku na edat di mas o menos 40 aña bo kurpa ta stòp di produsí anti-oksidante?

Anti-oksidante ta hunga un ròl signifikante den nos salú, pasobra nan por kontrolá kon lihé nos ta enbehesé dor di kombatí e radikalnan liber.

Life begins at forty?

Pues na e edat ei e radikalnan liber tin tur oportunidat di hasi i deshasi. Esei ta enserá ku nos kurpa por bira mas ásido i malesa ta manifestá mas lihé i mas fasil.

Sigur ta ku na e edat ei ta kumbiní nos pa bai kuida nos kurpa mas mihó i mas konsiente.
Promé ku tur kos, no ta nesesario warda te na e edat ei.

Kiko ta e trámitenan simpel ku nos por hasi?

  1. Mantené un estilo di bida saludabel, mental i físikamente.
  2. Kome konsiente:
    Bèrdura i fruta, nechi i simia. Tur, mas orgániko posibel.
    Tene kuenta ku orario di kome.
    Stòp ku kuminda prosesá, suku i baha man na e.o. karni (proteína).
  3. Bebe konsiente:
    bebe sufisiente awa di kalidat, djus natural, smoothies.
  4. Hasi ehersisio.
  5. Hasi uso di suplemento i vitamina.

E anti-oksidantenan mas konosí ta e.o. vitamina C i E i beta-carotene.
Varios fruta i bèrdura ta kontené anti-oksidante.

Kalidat di nos fruta, bèrdura, karni, galiña, webu etc. a baha enormemente. E kantidat di elemento di rasko i anti-oksidante ku nan tin ta mínimo.
Esei ta kondusí en grande na e tantísimo malesa i desbentaha di salú ku ta eksistí awendia.

No ta nada straño ku kanser, diabetes, obesitas, problema ku nir, tripa, higra i tambe problemanan di serebro i mental ta na òrdu di dia.
No ta straño tampoko ku gastunan médiko ta subi ketu bai.

Tur esakinan ta resultado di un estilo di bida deskabeyá. Uso di kímiko sintétiko, pèstisida, antibiotika, GMO etc. ta kondusí na tur esaki. Un estilo di bida ku no ta duradero.

E úniko salida, e úniko solushon ta pa nos ban bèk na naturalesa.

  • Ban kambia nos estilo di bida.
  • Ban kultivá nos kuminda na un manera orgániko/natural.
  • Ban drecha nos kalidat di awa
  • Ban biba mas konsiente den kontakto ku nos propio naturalesa
  • Ban kuida.

E konsepto EM, e estilo di bida di EM ta kumpli ku e kambio aki na mil maravia.

1. Nos por kuida i kultiva bestianan salú ku EM
2. Añadi antioksidante, vitamina i enzima na nos kultivo i bestianan ku EM
3. Laba i prepará nos kuminda ku EM
4. Mehorá nos medio-ambiente pafó i paden di kas ku EM (airu, awa, suela etc.)

Tur esaki na un manera sostenibel/duradero.

Pa mas informashon bishitá nos wèpsait www.hummingbirdfeather.com i/òf nos Facebookpagina di EMCuraçao.
Nos ta alkansabel telefónikamente na 747-1893 òf 516-5782.

Un kordial saludo,

 

Sandovar & Rina