Noti-ambiente 01 2014

Posted on Mar 9, 2014

Nos kultivo  –  Nos alimentu

 

Kerido kliente,

Meta prinsipal pa publiká nos notisiero ta pa kontribuí na un konsenshi nobo den e Era Nobo.
Kada un tópiko ku nos relatá ta di sumo importansia pa nos salú i nos medioambiente; teniendo en kuenta e generashonnan ku ta bini.

Awe nos ta papia tokante di nos kultivo, nos alimentu.
Den nos delaster noti-ambiente nos a para ketu na salubridat.
Nos salú ta estrechamente liá ku e.o. nos alimentu.

Tin un dicho ta bisa: “Bo ta loke bo ta kome”.

Aki na Kòrsou nos ta kome mas tantu loke ta wòrdu importá. Kon e produktonan ei a keda kultivá òf prosesá, no ta konosí pa nos. Pregunta:

• Nos tin sufisiente konosementu pa determiná si e loke nos ta kumpra ta kontené e nutrientenan ku ta salú pa e sistema ku nos kurpa ta funshoná?
• Tin instansia ku ta kontribuí pa averiguá si nos alimentu tin sufisiente nutriente?
• Tin profeshonalnan òf individualnan ku ta duna informashon riba e tópiko ei?

Delaster tempu tin mas i mas individual ku ta enfatisá riba alimentu mas saludabel.
E motibu prinsipal p’esei, ta e kantidat di hende ku ta sufri di e.o. obesitas, diabétis, alergia, artrítis  i hopi malesa mas.

Hopi ta buska pa sa e motibu prinsipal di nan malesa. Un dje motibunan ta e konsumo di kultivonan konvenshonal ku ta karesé na nutriente i ku alabes ta tratá ku pèstisida i hèrbisida. Huntu ku uso di antibiótika sintétiko, e sistema imunológiko ta debilitá konsiderabelmente. Nos a splika esei den noti-ambiente no. 5.

Algun punto simpel ku ta di sumo importansia pa nos klientenan ta na altura di dje.

1. Alimentu ku nos ta atkerí:

• Mayoria di fruta i bèrdura ku nos ta kumpra ta kultivá ku kímiko i pèstisida; tantu esun importá komo esun kultivá aki mes.
• Mayoria di karni, galiña i otro animal importá ta kriá ku antibiótika i hormona artifisial.
• Mayoria di kuminda di bleki ta kultivá, tratá i prosesá ku supstansianan kímiko.

     2. Nos manera di kombiná alimentu no ta aportá na un digestion salú. Algun ehèmpel ta:

• Kombinashon di karni, galiña òf piska ku: aros, batata òf funchi.
  • Solushon: Kome proteina ku bèrdura òf salada.
• Komementu di kuminda hasá.
  • Solushon: Kome kuminda di stom òf na fòrnu.
• Kombinashon di kuminda ku suku, kuminda ku fruta, diferente fruta huntu.
  • Solushon: Kome fruta su so. Prinsipalmente milon i patia.

Tur e kombinashonnan ariba menshoná ta kousa un konflikto den e stoma. E stoma no por digerí e alimentu na un manera adekuá ku konsekuensha ku tin alimentu ku ta putri den e tripa. Pues e mikrobionan degenerativo ta dominá. No ta straña nos ku mayoria di malesa ta kuminsá den nos tripa.

Den alimentashon tambe ta konta e mesun regla: “ Mas simpel, mas mihó”.
Simplesa ta un di e kalidatnan haltu den bandera di e Era Nobo.

Nos artíkulo di Food Combining ta duna un bon ilustrashon kon por trata ku nos alimentashon na un manera responsabel i salú.

 

Solushon práktiko pa nos klientenan

Den e era nobo nos tin ku karga nos propio responsabilidat.
Kuminsá planta bo mes bèrdura i fruta orgániko. Djòin bo bisiña òf amigu pa planta huntu i planta diverso. Si bo ta hasi esei kaba, pabien i stimulá otronan.
Si ta deseá, kria un par di bestia pa asina bo por haña alimentu orgániko i salú.
Eduká bo mes riba e tereno di kome, ki ora, kuantu i e kombinashonnan ku ta salú pa bo sistema.
Usa produktonan orgániko òf natural. E ehersisionan simpel aki mes lo demostrá kon bo kurpa por rekuperá di diferente malesa.

Ku e produktonan di EM bo por logra e rekomendashonnan ariba menshoná.

Loke ta sobresalí di EM (p.e EM-1 i Microferm) ta ku e ta trese un kambio regenerativo kaminda bo aplik’é.

Tuma inisiativa i aportá na ménos polushon di nos Dushi Kòrsou dor di resiklá bo sobrá di kushina fásilmente ku e hèmber di Bokashi. Ku e sistema akí bo ta resiklá i kultivá bo propio bèrdura i fruta ku masha poko esfuerso.

Protehá bo kultivo dor di hasi nan mas fuerte i resistente pa plaga i malesa, dor di usa EM-5 i/òf ekstrakto di mata fermentá ku EM-1. No mester di pèstisida i kímiko mas.

Otro produktonan pa mehorá e suela ta Agrigroei (elemento di rasgo), Mestbest (abono kompletu), Vulkamin (piedra mulá), Mineral di klei, i Kalki di kokolishi.

Den e ilustrashon nos ta mustra kon EM ta djòin ku e mikro-organismonan regenerativo i kambia e ambiente den un ambiente sostenibel, vital i harmonioso. Meskos ta sosodé ku e kultivo òf animal pa konsumo.

Atentamente

Sandovar